Nous vous informons que le délai de traitement des demandes de reproductions numériques sera momentanément plus important que d'ordinaire. Nous vous remercions de votre compréhension.
Document 3 - Foi et hommage de Geoffroy de Beauvoir à Antoine de Saigny
5 juin 1454. – Fonds Andelot
Archives départementales de la Côte-d’Or, E 34 ter
Je, Geoffroy de Beaulvoir, seign(eur) dudit lieu et de Mussy la Fosse, certifie a tous que, comme Anthoine de Saigny, seign(eu)r de Saffres, eust fait mettre en sa main les chasteaul, terres, rentes, proffiz, reven(us) et emolumens dudit Mussy et app(ar)tenen(ces) d’icelluy pour deffault de devoir de fied et hom(m)aige a lui non fait dudit Mussy et de ses d(ites) apparten(ances) mouvans de son fied a cause de son chasteaul et seignourie dudit Saffres, (com)me il dit et maintient, lequel fied et hom(m)aige je differay f(air)e jusques il m’eust apparu a suffisance que icelluy Mussy feust du fied d’icelluy Anthoine, seign(eu)r de Saffres. Ainsi est que, assés tost après lad(i)te mainmise, icelluy Anthoine de Saigny me monstra pluseurs l(ett)res et anciens enseignemens par lesquelx il me apparut suffisam(m)e(n)t lesdiz chasteaul et apparten(ances) dudit Mussy estre et mouvans du fied dudit Anthoine de Saigny a cause de son dit chasteaul de Saffres et les en cognoiz et confesse tenir. Et pour ce, aujourd’uy, je, ledit Geoffroy, suis entré en foy et hom(m)aige dudit Anthoine desdiz chasteaul et seignourie dudit Mussy la Fosse et des app(ar)ten(ances) et appenden(ces) d’icelluy et p(ro)mis en f(ai)re les s(er)vices en tel cas apparten(ans) a luy baill(e)r mon denombrem(en)t et declarat(ion) dedans temps deu. Tesmoing mon seing manuel et seel de mes armes cy mis, le cinq(uie)me jour du mois de juing, l’an mil quatre cens cinquante et quatre.
G. de Beauvoir